न्या य नि र्ण य
व्दाराः- मा. सौ. सविता प्र. भोसले, अध्यक्षा
1. तक्रारदारांनी प्रस्तुत तक्रार अर्ज ग्राहक सरंक्षण कायदयातील तरतुदीप्रमाणे दाखल केला आहे. तक्रार अर्जातील कथन थोडक्यात पुढीलप्रमाणे—
तक्रारदारांनी वि.प. कंपनीकडून रक्कम रु. 50,000/- या रकमेची पॉलिसी 5 वर्षांसाठी दामदुप्पट योजनेअंतर्गत केली होती. सदर पॉलिसीची मुदत दि. 6/72017 रोजी संपणार आहे. सध्या कंपनी बंद आहे तसेच कंपनीचे मालक महेश मोटेवार हे सध्या अटक आहेत असे समजल्याने तक्रारदार हे कंपनीचे प्रतिनिधी श्री सचिन वाघमारे यांना सोबत घेवून वि.प. यांच्या कोल्हापूर येथील शाखेत गेले असता सदरचे कार्यालय बंद होते. आजूबाजूला चौकशी केली असता सदरचे कार्यालय हे 2 वर्षांपासून बंद असल्याचे समजले. म्हणून, तक्रारदाराने प्रस्तुतचा तक्रारअर्ज या आयोगात दाखल केला आहे.
2. प्रस्तुतकामी तक्रारदाराने वि.प. यांचेकडून दि. 6/7/2017 रोजी देय असणारी रक्कम रु. 1,00,000/- किंवा विलंब झालेस द.सा.द.शे. 11 टक्के व्याज, मानसिक त्रासापोटी रु.25,000/- व तक्रारअर्जाचा खर्च रु.15,000/- वि.प. कडून वसूल होवून मिळावा अशी विनंती तक्रारदाराने याकामी केली आहे.
3. तक्रारदाराने सदरकामी अॅफिडेव्हीट, कागदयादी सोबत वि.प. कंपनी बंद असलेचा फोटो, पॉलिसी सर्टिफिकेट, पैसे भरल्याची पावती, सेल अॅग्रीमेंट व ओळखपत्र वगैरे कागदपत्रे दाखल केली आहेत.
4. प्रस्तुत कामी वि.प.क्र.1 व 2 यांना जाहीर नोटीस लागू होऊनही सदर वि.प. हे याकामी गैरहजर राहिलेने वि.प.क्र.1 व 2 यांचेविरुध्द एकतर्फा आदेश नि.1 वर पारीत झालेला आहे.
5. वर नमूद तक्रारदार यांनी दाखल केले सर्व कागदपत्रांचे अवलोकन करुन मे. मंचाने सदर तक्रार अर्जाचे निराकरणार्थ पुढील मुद्दे विचारात घेतले.
अ. क्र. | मुद्दा | उत्तरे |
1 | तक्रारदार व वि.प. हे नात्याने ग्राहक व सेवापुरवठादार आहेत काय ? | होय. |
2 | वि.प.क्र.1 व 2 यांनी तक्रारदाराला सदोष सेवा पुरविली आहे काय ? | होय. |
3 | तक्रारदार हे वि.प. क्र.1 व 2 यांचेकडून देय रक्कम परत मिळणेस व नुकसान भरपाई मिळणेस पात्र आहेत काय ? | होय. |
4 | अंतिम आदेश काय ? | खालील नमूद आदेशाप्रमाणे. |
वि वे च न –
6. वर नमूद मुद्दा क्र.1 ते 3 ची उत्तरे आम्ही होकारार्थी दिली आहेत कारण तक्रारदारांनी वि.प. कंपनीकडे रक्कम रु. 50,000/- इतकी रक्कम दि. 7/1/2012 रोजी भरलेली असून त्याबाबत वि.प. यांनी दिलेल्या प्रमाणपत्र क्र. 0006729 ची प्रत याकामी तक्रारदाराने दाखल केली आहे. सदर प्रमाणपत्रामध्ये मुदतीनंतर रक्कम रु.1,00,000/-तक्रारदारांना देय असलेबाबतचा स्पष्ट उल्लेख दिसून येतो. तक्रारदाराने भरलेल्या रकमेची पोहोचपावतीही याकामी तक्रारदारांनी दाखल केली आहे. वि.प.क्र.1 व 2 यांनी याकामी हजर होवून प्रस्तुत बाब नाकारलेली नाही. सबब, तक्रारदार व वि.प.क्र.1 व 2 हे नात्याने ग्राहक व सेवापुरवठादार आहेत ही बाब निर्विवादपणे स्पष्ट सिध्द झाली आहे. सबब, मुद्दा क्र.1 चे उत्तर आम्ही होकारार्थी दिले आहे.
7. तक्रारदारांचे तक्रारअर्जातील कथनानुसार, तक्रारदारांनी वि.प. कंपनीकडून रक्कम रु. 50,000/- या रकमेची पॉलिसी 5 वर्षांसाठी दामदुप्पट योजनेअंतर्गत केली होती. सदर पॉलिसीची मुदत दि. 6/72017 रोजी संपणार आहे. सध्या कंपनी बंद आहे तसेच कंपनीचे मालक महेश मोटेवार हे सध्या अटक आहेत असे समजल्याने तक्रारदार हे कंपनीचे प्रतिनिधी श्री सचिन वाघमारे यांना सोबत घेवून वि.प. यांच्या कोल्हापूर येथील शाखेत गेले असता सदरचे कार्यालय बंद होते. आजूबाजूला चौकशी केली असता सदरचे कार्यालय हे 2 वर्षांपासून बंद असल्याचे समजले, अशी तक्रारदाराची तक्रार आहे. सदर कथनाचे पुष्ठयर्थ तक्रारदाराने गुंतवणूक केल्याचे प्रमाणपत्र दाखल केले आहे. त्यावर तक्रारदाराने रक्कम रु.50,000/- वि.प. कंपनीकडे जमा केल्याचे नमूद असून मुदती नंतर रक्कम रु. 1,00,000/- देय असल्याचे नमूद आहे. तसेच तक्रारदाराने याकामी सेल अॅग्रीमेंटही दाखल केले आहे. सदर अॅग्रीमेंटवर वि.प.तर्फे अधिकृत अधिका-याची सही आहे. सदरचे गुंतवणूक प्रमाणपत्र तसेच सेल अॅग्रीमेंट वि.प. यांनी याकामी हजर होवून नाकारलेले नाही. तसेच तक्रारदाराचे तक्रारअर्जातील कोणतीही कथने वि.प. यांनी याकामी हजर होवून नाकारलेली नाहीत. वि.प. क्र.1 व 2 यांना तक्रारअर्जाची जाहीर नोटीस लागू होऊनसुध्दा ते याकामी मंचात हजर झाले नाहीत. सबब, वि.प.क्र.1 व 2 यांचेविरुध्द नि.1 वर एकतर्फा आदेश पारीत झालेला आहे. म्हणजेच वि.प. क्र.1 व 2 यांनी तक्रारदाराचे तक्रारअर्जातील कोणतेही कथन खोडून काढलेले नाही. सबब, तक्रारदाराने तक्रारअर्जात केले कथनांवर विश्वासार्हता ठेवणे न्यायोचित वाटते. सदरची बाब विचारात घेता, वि.प.क्र.1 व 2 यांनी तक्रारदार यांना गुंतवणूक प्रमाणपत्रात नमूद केल्याप्रमाणे मुदत संपल्यानंतर रक्कम रु. 1,00,000/- अदा केलेली नाही ही बाब शाबीत होते असे या आयोगाचे मत आहे. सबब, वि.प.क्र.1 व 2 यांनी तक्रारदाराला सदोष सेवा दिली आहे या निष्कर्षाप्रत हे आयोग येत आहे.
8. सबब, तक्रारदार हे वि.प.क्र.1 व 2 यांचेकडून गुंतवणूक प्रमाणपत्र क्र. 0006729 अंतर्गत मुदतीनंतर देय असणारी रक्कम रु.1,00,000/- मिळणेस पात्र आहेत. तसेच सदरचे रकमेवर पॉलिसीची मुदत संपलेनंतर ते संपूर्ण रक्कम प्रत्यक्ष तक्रारदारास मिळेपावेतो द.सा.द.शे. 6 टक्के दराने व्याज मिळणेस तक्रारदार पात्र आहेत. तसेच मानसिक त्रासापोटी रक्कम रु.10,000/- व अर्जाचे खर्चापोटी रु.5,000/- अशी रक्कम वि.प. क्र.1 व 2 यांचेकडून वसूल होवून मिळणेस तक्रारदार पात्र आहेत या निष्कर्षाप्रत हे आयोग मंच येत आहे.
सबब, प्रस्तुत कामी आम्ही पुढीलप्रमाणे अंतिम आदेश पारीत करीत आहोत.
आदेश
1) तक्रारदाराचा तक्रारअर्ज अंशतः मंजूर करणेत येतो.
2) वि.प. क्र.1 व 2 यांनी तक्रारदार यांना गुंतवणूक प्रमाणपत्र क्र. 0006729 अंतर्गत मुदतीनंतर देय असणारी रक्कम रु.1,00,000/- अदा करावी. तसेच सदरचे रकमेवर मुदत संपलेनंतर ते संपूर्ण रक्कम प्रत्यक्ष तक्रारदारास मिळेपावेतो द.सा.द.शे. 6 टक्के दराने व्याज अदा करावे.
3) मानसिक त्रासापोटी रक्कम रु.10,000/- व अर्जाचा खर्च रु.5,000/- वि.प. क्र.1 व 2 यांनी तक्रारदारास अदा करावेत.
4) वर नमूद सर्व आदेशांची पूर्तता वि.प. क्र.1 व 2 यांनी आदेशाची प्रत मिळाले तारखेपासून 45 दिवसांत करावी.
5) विहीत मुदतीत आदेशांची पूर्तता न केलेस ग्राहक संरक्षण कायदा 2019 चे कलम 71 व 72 अन्वये कारवाई करणेची मुभा तक्रारदाराला देणेत येते.
6) आदेशाच्या सत्यप्रती उभय पक्षकारांना विनामुल्य पाठवाव्यात.
