तक्रारदार पुकारले असता गैरहजर. सामनेवाला वकील श्री.रईस शेख हजर. सदर प्रकरणामध्‍ये तक्रारदारांनी विलंब माफीचा अर्ज दाखल केला असून सदर अर्जावर उभय पक्षाचा युक्‍तीवाद दि.22.04.2019 रोजी ऐकण्‍यात आला आहे. सदर तक्रार तक्रारदारांनी सामनेवाला यांच्‍याकडून विमान प्रवासाबाबत अदा केलेली रक्‍कम विमान प्रवासाची तिकिट तक्रारदाराचे पत्‍नीला बरे नसल्‍याने रद्द केल्‍यामुळे परत मागितली आहे. तक्रारदाराचे म्‍हणण्‍या प्रमाणे सामनेवाला यांनी सदर क्‍लेमची संपूर्ण रक्‍कम तक्रारदारांना परत न केल्‍याने तक्रारदारांनी प्रस्‍तूत तक्रार सामनेवाला यांचे विरुध्‍द दाखल केली आहे. तक्रारदारांच्‍या सिनॉप्‍सेसचा विचार केला असता सप्‍टेंबर- 2012 मध्‍ये सामनेवाला यांनी तक्रारदारांना सदर तिकिटाबाबतच्‍या रक्‍कमे पैकी काही रक्‍कम परत केल्‍याचे तक्रारदारांना कळविल्‍याचे नमूद आहे व उर्वरित रक्‍कमेबाबत तक्रारदारांनी फेब्रुवारी-2013 मध्‍ये सामनेवाला यांना कायदेशिर नोटीस पाठवून उर्वरित रक्‍कमेची मागणी केली, परंतु सदर रक्‍कम सामनेवाला यांनी तक्रारदारांना दिली नसल्‍याचे नमूद करुन तक्रारदारांनी प्रस्‍तूत तक्रार मंचा समक्ष सादर केली आहे. विलंब माफीच्‍या अर्जामध्‍ये तक्रारदारांनी सदर तक्रार दाखल करणेकामी वकील मे.शितल गौड (Mrs.Shital Goad) यांना सन-2013 मध्‍ये नियुक्‍त केले होते तसेच सदर तक्रार दाखल करणेकामी दि.24.12.2013 रोजी साक्षांकित करुन घेतली होती. परंतु तक्रारदाराच्‍या वर नमूद वकीलांनी सदर तक्रार त्‍यांच्‍याकडून हरविली असल्‍याने मंचा समक्ष दाखल केली नाही असे तक्रारदारांना त्‍याबाबत वर नमूद वकीलांच्‍या क्‍लार्ककडे चौकशी केली असता समजले. परंतु तक्रारदारांना सदर तक्रार दाखल केली असल्‍याचे सांगण्‍यात आले होते. त्‍यांनतर तक्रारदार पुन्‍हा नोव्‍हेंबर- 2018 मध्‍ये सदर तक्रारीबाबत चौकशी करण्‍यासाठी गेले असता,त्‍यांना वर नमूद वकीलांनी सदर तक्रार मंचा समक्ष दाखल केली नसल्‍याचे आढळले. त्‍यानंतर प्रस्‍तूत तक्रारीचा संच वर नमूद वकीलांच्‍याच कार्यालयातून सापडल्‍याचे तक्रारदारांनी नमूद केले आहे. तक्रारदारांनी त्‍यानंतर नवीन वकीलांची नियुक्‍ती करुन प्रस्‍तूत तक्रार दाखल करण्‍याची जबाबदारी नवीन वकीलांवर सोपवून त्‍यानुसार दि.19.01.2019 रोजी तक्रारदाराच्‍या नवीन वकीलांनी म्‍हणजेच श्री.ए.पी.खांडोरी यांनी प्रस्‍तूत तक्रार मंचा समक्ष फाईल केली आहे. सामनेवाला यांनी सदर प्रकरणामध्‍ये तक्रारदारांचा प्रस्‍तूत अर्ज हा मोघम स्‍वरुपाचा असल्‍याने फेटाळण्‍यात यावा असे नमूद केले आहे.  परंतु सदर विलंब माफीच्‍या अर्जासह दाखल केलेल्‍या कागदपत्रांमध्‍ये तक्रारदारांनी दि.24.10.2013 रोजी वकील श्रीमती. शितल गौड यांच्‍याकडून प्रस्‍तूत तक्रार दाखल करणेकामी तयार करुन घेतली असून, ती टोलट अॅन्‍ड कंपनी यांच्‍याकडून 2013 मध्‍ये साक्षांकित करुन घेतल्‍याचे दिसून येते. त्‍यासह वकील श्रीमती.शितल गौड यांच्‍या नावे असलेला वकालतनामा पान क्र.14 वर तक्रारदारांनी जोडलेला आहे. त्‍यावरील तारीख पुन्‍हा गिरविल्‍याचे दिसून येते. वर नमूद केल्‍या प्रमाणे तक्रारदारांनी वकील श्रीमती.शितल गौड यांना सदर तक्रार दाखल करणेकामी जबाबदारी दिली होती परंतु तक्रारदार यांचे वकीलांनी ती मंचा समक्ष दाखल केली नाही हे दिसून येते. सबब, ग्राहक हिताच्‍या दृष्‍टीने प्रकरण गुणवत्‍तेच्‍या आधारे निकाली काढणे गरजेचे असल्‍याने तक्रारदारांच्‍या पूर्वीच्‍या वकीलांच्‍या चुकीमुळे अथवा झालेल्‍या विलंबामुळे तक्रारदारांना त्‍याचा नाहक त्रास होऊ नये असे मंचाचे मत आहे.  सबब, तक्रारदारांचा विलंब माफीचा अर्ज न्‍यायहिताच्‍यादृष्‍टीने मंजूर करण्‍यात येतो. त्‍यामधील 05 वर्ष व 275 दिवसांचा विलंब माफ करण्‍यात येतो. विलंब माफीचा अर्ज निकाली. तक्रारदार आजरोजी गैरहजर असल्‍याने तक्रार दाखल करण्‍याचे युक्‍तीवादासाठी पु.ने.ता.14.06.2019.