न्या य नि र्ण य
व्दाराः- मा. सौ. सविता प्र. भोसले, अध्यक्षा
1. तक्रारदारांनी प्रस्तुत तक्रार अर्ज ग्राहक सरंक्षण कायदयाचे कलम 34 व 35 प्रमाणे दाखल केला आहे. तक्रार अर्जातील कथन थोडक्यात पुढीलप्रमाणे—
तक्रारदार यांनी www.Tkameez.com या वेबसाईटवर खालीलप्रमाणे खरेदी केली.
दिनांक | तपशील | नग | रक्कम | शेरा |
19/6/2020 | टी शर्ट | 4 | 787/- | बदलून मिळाला नाही |
23/6/2020 | टी शर्ट | 4 | 1,088/- | बदलून मिळाला नाही |
15/10/20 | टी शर्ट | 4 | 123/- | बदलून मिळाला नाही |
एकूण रक्कम रु. | 1,998/- | |
परंतु सदरचे निवडलेले टी शर्ट न येता दुसरेच आले. याबाबत तक्रारदारांनी संबंधीत कंपनीच्या मेल support@tkameez.com आयडीवर मेल केला असता पहिल्या मेलला त्यांनी लॉकडाऊन संपल्यानंतर टी शर्ट बदलून दिले जातील असे सांगितले. परंतु अजूनपर्यंत त्यांनी टी शर्ट बदलून दिलेले नाहीत. अशा प्रकारे निवडलेले टी शर्ट न देता दुसरेच देवून वि.प. यांनी तक्रारदाराला मानसिक त्रास दिला आहे. अशा प्रकारे वि.प. यांनी सेवात्रुटी केली आहे. म्हणून, तक्रारदाराने प्रस्तुतचा तक्रारअर्ज या आयोगात दाखल केला आहे.
2. प्रस्तुतकामी तक्रारदाराने वि.प. यांनी दिलेले टी शर्ट बदलून त्याऐवजी तक्रारदारांनी निवडलेले टी शर्ट द्यावेत, मानसिक त्रासापोटी रु.10,000/-, तक्रार अर्जाचा खर्च रु.5,000/- वि.प. कडून वसूल होवून मिळावा अशी विनंती तक्रारदाराने याकामी केली आहे.
3. तक्रारदाराने सदरकामी अॅफिडेव्हीट, कागदयादी सोबत वि.प. कंपनीला केलेले मेल, तक्रारदाराने वेबसाईटवर निवड केलेले टी शर्ट, टी शर्टची बिले वगैरे कागदपत्रे दाखल केली आहेत. तसेच पुरावा शपथपत्र दाखल केले आहे.
4. प्रस्तुत कामी वि.प. यांना नोटीस लागू होऊनही सदर वि.प. याकामी गैरहजर राहिलेने वि.प. यांचेविरुध्द एकतर्फा आदेश नि.1 वर पारीत झालेला आहे.
5. वर नमूद तक्रारदार यांनी दाखल केले सर्व कागदपत्रांचे अवलोकन करुन मे. मंचाने सदर तक्रार अर्जाचे निराकरणार्थ पुढील मुद्दे विचारात घेतले.
अ.क्र. | मुद्दा | उत्तरे |
1 | तक्रारदार व वि.प. हे नात्याने ग्राहक व सेवापुरवठादार आहेत काय ? | होय. |
2 | वि.प. कंपनीने तक्रारदाराला सदोष सेवा पुरविली आहे काय ? | होय. |
3 | तक्रारदार हे वि.प. यांचेकडून टी शर्ट बदलून मिळणेस किंवा शर्टची रक्कम मिळणेस व नुकसान भरपाई मिळणेस पात्र आहेत काय ? | होय. |
4 | अंतिम आदेश काय ? | खालील नमूद आदेशाप्रमाणे. |
वि वे च न –
6. वर नमूद मुद्दा क्र.1 ते 3 ची उत्तरे आम्ही होकारार्थी दिली आहेत कारण तक्रारदार यांनी वि.प. यांचेकडून www.Tkameez.com या वेबसाईटवरुन दि. 19/6/20, 23/6/20 व 15/10/20 रोजी रक्कम रु. 1,998/- देवून टी शर्ट खरेदी केले. सदर खरेदीची बिले तक्रारदार यांनी याकामी दाखल केली आहेत. वि.प. यांनी याकामी हजर होवून प्रस्तुत बाब नाकारलेली नाही. सबब, तक्रारदार व वि.प. हे नात्याने ग्राहक व सेवापुरवठादार आहेत ही बाब निर्विवादपणे स्पष्ट सिध्द झाली आहे. सबब, मुद्दा क्र.1 चे उत्तर आम्ही होकारार्थी दिले आहे.
7. तक्रारदारांचे तक्रारअर्जातील कथनानुसार, तक्रारदारांनी निवडलेले टी शर्ट न येता दुसरेच आले. याबाबत तक्रारदारांनी संबंधीत कंपनीच्या support@tkameez.com या मेल आयडीवर मेल केला असता पहिल्या मेलला त्यांनी लॉकडाऊन संपल्यानंतर टी शर्ट बदलून दिले जातील असे सांगितले. परंतु अजूनपर्यंत त्यांनी टी शर्ट बदलून दिलेले नाहीत. अशा प्रकारे निवडलेले टी शर्ट न देता दुसरेच देवून वि.प. यांनी तक्रारदाराला मानसिक त्रास दिला आहे. तक्रारदारांनी वि.प. कंपनीला पाठविलेल्या मेलच्या प्रती तक्रारदारांनी याकामी दाखल केलेल्या आहेत. तसेच तक्रारदारांनी संबंधीत वेबसाईटवर सिलेक्ट केलेले टी शर्ट याची प्रत दाखल केली आहे. तक्रारदाराचे तक्रारअर्जातील सदरची कथने वि.प. यांनी याकामी हजर होवून नाकारलेली नाहीत. वि.प. यांना तक्रारअर्जाची नोटीस लागू होऊनसुध्दा ते याकामी आयोगात हजर झाले नाहीत. म्हणून, वि.प. यांचेविरुध्द नि.1 वर एकतर्फा आदेश पारीत झालेला आहे. म्हणजेच वि.प. यांनी तक्रारदाराचे तक्रारअर्जातील कोणतेही कथन खोडून काढलेले नाही. तक्रारदारांनी तक्रारअर्जातील कथनांचे पुष्ठयर्थ पुराव्याचे शपथपत्र दाखल केले आहे. सबब, तक्रारदाराचे तक्रारअर्जातील कथनांवर विश्वासार्हता ठेवणे न्यायोचित वाटते. सबब, वि.प. यांनी तक्रारदारांनी निवडलेले शर्ट न पाठविता दुसरेच शर्ट पाठवून तक्रारदाराला सदोष सेवा दिली आहे या निष्कर्षाप्रत हे आयोग येत आहे.
8. सबब, तक्रारदार हे वि.प. यांचेकडून वि.प. यांनी पाठविलेले चुकीचे टी शर्ट बदलून त्याऐवजी तक्रारदारांनी निवड केलेले टी शर्ट बदलून मिळणेस पात्र आहेत. जर तसे करणे वि.प. यांना शक्य नसेल तर तक्रारदार हे वि.प. यांचेकडून टी शर्ट खरेदीची एकूण रक्कम रु.1,998/- परत मिळणेस पात्र आहेत. तसेच मानसिक त्रासापोटी रक्कम रु. 3,000/- व अर्जाचे खर्चापोटी रक्कम रु.2,000/- वि.प. यांचेकडून वसूल होवून मिळणेस तक्रारदार पात्र आहेत या निष्कर्षाप्रत हे आयोग मंच येत आहे.
सबब, प्रस्तुत कामी आम्ही पुढीलप्रमाणे अंतिम आदेश पारीत करीत आहोत.
आदेश
1) तक्रारदाराचा तक्रारअर्ज अंशतः मंजूर करणेत येतो.
2) वि.प. यांनी तक्रारदार यांना दिलेले चुकीचे टी शर्ट बदलून त्याऐवजी तक्रारदारांनी निवड केलेले टी शर्ट बदलून द्यावेत.
अथवा
वर नमूद आदेशाचे पालन करणे वि.प. यांना शक्य नसेल तर वि.प. यांनी तक्रारदारास टी शर्ट खरेदीची एकूण रक्कम रु.1,998/- परत करावी.
3) मानसिक त्रासापोटी रक्कम रु.3,000/- व अर्जाचा खर्च रु.2,000/- वि.प. यांनी तक्रारदारास अदा करावेत.
4) वर नमूद सर्व आदेशांची पूर्तता वि.प. यांनी आदेशाची प्रत मिळाले तारखेपासून 45 दिवसांत करावी.
5) विहीत मुदतीत आदेशांची पूर्तता न केलेस ग्राहक संरक्षण कायदयातील तरतुदींनुसार योग्य ती कारवाई करणेची मुभा तक्रारदाराला देणेत येते.
6) आदेशाच्या सत्यप्रती उभय पक्षकारांना विनामुल्य पाठवाव्यात.
