न्या य नि र्ण य
व्दाराः- मा. सौ. सविता प्र. भोसले, अध्यक्षा
1. तक्रारदारांनी प्रस्तुत तक्रार अर्ज ग्राहक सरंक्षण कायदा, 1986 चे कलम 11 प्रमाणे दाखल केला आहे. तक्रार अर्जातील कथन थोडक्यात पुढीलप्रमाणे—
तक्रारदार यांनी वि.प.क्र.1 कडे रक्कम रु. 50,000/- देवून सदर वि.प. हॉटेलच्या नामांकित प्रॉपर्टीकडे सुट्टीमध्ये पॅकेज उपलब्धीनुसार रुम्स व इतर सुविधा देणेचे मान्य केले होते. परंतु वि.प.क्र.1 यांचा व्यवसाय बंद पडला असून सदरील मेंबरशीप रद्द करावयाची असल्यास मेंबरनी वि.प.क्र.1 यांचे ऑफिसमध्ये भेटून कागदपत्रांची पूर्तता करुन रक्कम परतावा घेण्यासाठी रिसीट घेणे आवश्यक होते. त्याप्रमाणे दि. 14/09/2017 रोजी वि.प. यांनी तक्रारदाराची मेंबरशीप रद्द केलेबाबत व रु.50,000/- वि.प. यांना देणे लागत असल्याबाबत पावती दिलेली आहे. तदनंतर तक्रारदार हे वि.प. यांचेकडे वारंवार रक्कम परत मिळण्याबाबत विचारणा करीत आहेत. परंतु त्यांना रक्कम व त्यावरील व्याज देण्यात आलेले नाही. अशा प्रकारे वि.प. यांनी सेवात्रुटी केली आहे. म्हणून तक्रारदाराने प्रस्तुतचा तक्रारअर्ज या आयोगात दाखल केला आहे.
2. प्रस्तुतकामी तक्रारदाराने वि.प. यांचेकडून रक्कम रु. 50,000/- व त्यावर द.सा.द.शे. 18 टक्के दराने व्याज, मानसिक त्रासापोटी रु.20,000/-, तक्रारीचा खर्च रु. 10,000/- वि.प. कडून मिळावा अशी विनंती तक्रारदाराने याकामी केली आहे.
3. तक्रारदाराने सदरकामी अॅफिडेव्हीट, कागदयादी सोबत मेंबरशीप रिसीट, मेंबरशीप सर्टिफिकेट, मेंबरशीप रद्द केलेची पावती इ. कागदपत्रे दाखल केली आहेत. तसेच पुरावा शपथपत्र व लेखी युक्तिवाद दाखल केला आहे.
4. प्रस्तुत कामी वि.प.क्र.1 व 2 यांना नोटीस लागू होऊनही सदर वि.प. याकामी गैरहजर राहिलेने वि.प. यांचेविरुध्द एकतर्फा आदेश नि.1 वर पारीत झालेला आहे.
5. वर नमूद तक्रारदार यांनी दाखल केले सर्व कागदपत्रांचे अवलोकन करुन मे. मंचाने सदर तक्रार अर्जाचे निराकरणार्थ पुढील मुद्दे विचारात घेतले.
अ. क्र. | मुद्दा | उत्तरे |
1 | तक्रारदार व वि.प. हे नात्याने ग्राहक व सेवापुरवठादार आहेत काय ? | होय. |
2 | वि.प. यांनी तक्रारदाराला सदोष सेवा पुरविली आहे काय ? | होय. |
3 | तक्रारदार हे वि.प. यांचेकडून मेंबरशीप रक्कम परत मिळणेस व नुकसान भरपाई मिळणेस पात्र आहेत काय ? | होय. |
4 | अंतिम आदेश काय ? | खालील नमूद आदेशाप्रमाणे. |
वि वे च न –
6. वर नमूद मुद्दा क्र.1 ते 3 ची उत्तरे आम्ही होकारार्थी दिली आहेत कारण तक्रारदार यांनी वि.प.क्र.1 कडे रक्कम रु. 50,000/- देवून मेंबरशीप स्वीकारली आहे. त्यानुसार वि.प. यांनी सदर वि.प. हॉटेलच्या नामांकित प्रॉपर्टीकडे सुट्टीमध्ये पॅकेज उपलब्धीनुसार रुम्स व इतर सुविधा देणेचे मान्य केले होते. तक्रारदारांनी सदर मेंबरशीप स्वीकारल्याची पावती याकामी हजर केली आहे तसेच मेंबरशीप सर्टिफिकेट क्र. 0766735 दाखल केले आहे. वि.प.क्र.1 व 2 यांनी याकामी हजर होवून प्रस्तुत बाब नाकारलेली नाही. सबब, तक्रारदार व वि.प. क्र.1 व 2 हे नात्याने ग्राहक व सेवापुरवठादार आहेत ही बाब निर्विवादपणे स्पष्ट सिध्द झाली आहे. सबब, मुद्दा क्र.1 चे उत्तर आम्ही होकारार्थी दिले आहे.
7. तक्रारदारांचे तक्रारअर्जातील कथनानुसार, वि.प.क्र.1 यांचा व्यवसाय बंद पडला असून सदरील मेंबरशीप रद्द करावयाची असल्यास मेंबरनी वि.प.क्र.1 यांचे ऑफिसमध्ये भेटून कागदपत्रांची पूर्तता करुन रक्कम परतावा घेण्यासाठी रिसीट घेणे आवश्यक होते. त्याप्रमाणे दि. 14/09/2017 रोजी वि.प. यांनी तक्रारदाराची मेंबरशीप रद्द केलेबाबत व रु.50,000/- वि.प. यांना देणे लागत असल्याबाबत पावती दिलेली आहे. तदनंतर वारंवार विचारणा करुनही वि.प. यांनी तक्रारदारांना रक्कम व त्यावरील व्याज दिलेले नाही अशी तक्रारदाराची तक्रार आहे. तक्रारदारांची सदर कथनांचे पुष्ठयर्थ रु.50,000/- वि.प. यांचेकडे भरुन मेंबरशीप घेतल्याची पावती व सर्टिफिकेट क्र. 0766735 दाखल केले आहे. सदरचे सर्टिफिकेटचे अवलोकन करता तक्रारदारांनी रक्कम भरल्याचे दिसून येते. तसेच तक्रारदारांनी सदरची मेंबरशीप रद्द केलेची पावतीही याकामी दाखल केली आहे. मेंबरशीप रद्द केलेनंतर वि.प. यांनी तक्रारदाराची रक्कम व्याजासहीत अदा करणे हे वि.प. यांचेवर बंधनकारक होते. परंतु वि.प. यांनी सदरची रक्कम तक्रारदारास अदा केलेली नाही. तक्रारदाराचे तक्रारअर्जातील सदरची कथने वि.प. यांनी याकामी हजर होवून नाकारलेली नाहीत. वि.प.क्र.1 व 2 यांना तक्रारअर्जाची नोटीस लागू होऊनसुध्दा ते याकामी मंचात हजर झाले नाहीत. सबब, वि.प. क्र.1 व 2 यांचेविरुध्द नि.1 वर एकतर्फा आदेश पारीत झालेला आहे. म्हणजेच वि.प. क्र.1 व 2 यांनी तक्रारदाराचे तक्रारअर्जातील कोणतेही कथन खोडून काढलेले नाही. तक्रारदारांनी त्यांचे कथनाचे पुष्ठयर्थ पुराव्याचे शपथपत्र दाखल केले आहे. सबब, तक्रारदाराने तक्रारअर्जात केले कथनांवर विश्वासार्हता ठेवणे न्यायोचित वाटते. सदरची बाब विचारात घेता, वि.प. क्र.1 व 2 यांनी तक्रारदाराची मेंबरशीप रद्द करुनही तक्रारदार यांनी वि.प.कडे भरलेली रक्कम रु. 50,000/- व त्यावरील व्याज अद्याप परत दिलेले नाही ही बाब शाबीत होते. सबब, वि.प. क्र.1 व 2 यांनी तक्रारदाराला सदोष सेवा दिली आहे या निष्कर्षाप्रत हे आयोग येत आहे.
8. सबब, तक्रारदार हे वि.प. यांचेकडून रक्कम रु. 50,000/- परत मिळणेस पात्र आहेत तसेच सदर रकमेवर रक्कम भरले तारखेपासून संपूर्ण रक्कम हाती पडेपर्यंत द.सा.द.शे. 6 टक्के दराने व्याज मिळणेस तक्रारदार पात्र आहेत. तसेच मानसिक त्रासापोटी रक्कम रु.10,000/- व अर्जाचे खर्चापोटी रु.5,000/- अशी रक्कम वि.प.क्र.1 व 2 यांचेकडून मिळणेस तक्रारदार पात्र आहेत या निष्कर्षाप्रत हे आयोग मंच येत आहे.
सबब, प्रस्तुत कामी आम्ही पुढीलप्रमाणे अंतिम आदेश पारीत करीत आहोत.
आदेश
1) तक्रारदाराचा तक्रारअर्ज अंशतः मंजूर करणेत येतो.
2) वि.प.क्र.1 व 2 यांनी तक्रारदार यांना रक्कम रु.50,000/- अदा करावी व सदर रकमेवर रक्कम भरले तारखेपासून संपूर्ण रक्कम हाती पडेपर्यंत द.सा.द.शे. 6 टक्के दराने व्याज अदा करावे.
3) मानसिक त्रासापोटी रक्कम रु.10,000/- व अर्जाचा खर्च रु.5,000/- वि.प. क्र.1 व 2 यांनी तक्रारदारास अदा करावेत.
4) वर नमूद सर्व आदेशांची पूर्तता वि.प. क्र.1 व 2 यांनी आदेशाची प्रत मिळाले तारखेपासून 45 दिवसांत करावी.
5) विहीत मुदतीत आदेशांची पूर्तता न केलेस ग्राहक संरक्षण कायदा 2019 चे कलम 71 व 72 अन्वये कारवाई करणेची मुभा तक्रारदाराला देणेत येते.
6) आदेशाच्या सत्यप्रती उभय पक्षकारांना विनामुल्य पाठवाव्यात.
