पुनर्विलोकन अर्ज क्रमांक : 4/2022.                      अर्ज दाखल दिनांक : 04/11/2022.                                                                                       आदेश दिनांक : 30/11/2022.

(1) मॅनेजर तथा मुख्य व्यवस्थापक, ए यु स्मॉल फायनान्स बँक लि.,

     ए यु निव्ह, 19-अ, धुळेश्वर गार्डन, अजमेर रोड,

     जयपूर - 302 001 (राजस्थान).

(2) मॅनेजर तथा मुख्य व्यवस्थापक, ए यु स्मॉल फायनान्स बँक लि.,

      शाखा : बार्शी रोड, लातूर, ता. जि. लातूर.                                           अर्जदार

                        विरुध्द

सोपान पिता भिमराव पांचाळ, वय 32 वर्षे, व्यवसाय : मजुरी,

रा. मु. अंकोली, पो. सावरगाव, ता. जि. लातूर.                                           उत्तरवादी

गणपूर्ती :          मा. श्रीमती रेखा जाधव, अध्‍यक्ष (अतिरिक्त कार्यभार)

                        मा. श्री. रविंद्र शे. राठोडकर, सदस्य

अर्जदार यांच्याकरिता विधिज्ञ :- सचिन एम. सास्तुरकर

आदेश 

मा. श्रीमती रेखा जाधव, अध्‍यक्ष (अतिरिक्त कार्यभार)यांचे द्वारा :-

(1)       अर्जदार यांनी ग्राहक संरक्षण अधिनियम, 2019 अंतर्गत प्रस्तुत आवेदनपत्र दाखल केले आणि जिल्हा आयोगाने ग्राहक तक्रार क्र. 52/2021 मध्ये दि.26/8/2022 रोजी दिलेल्या आदेशाचे पुनर्विलोकन करुन रकमेच्या देणे-घेण्याबाबत उत्तरवादी यांच्याकडून स्पष्टीकरण घ्यावे, अशी विनंती केली. 

(2)       अर्जदार यांच्याकरिता विधिज्ञांचा युक्तिवाद ऐकला. ग्राहक तक्रार क्र. 52/2021 चा अभिलेख व त्यामध्ये दि.26/8/2022 रोजी दिलेल्या आदेशाचे अवलोकन केले. तसेच प्रस्तुत आवेदनपत्रासोबत दाखल कागदपत्रांचे अवलोकन केले. प्रकरणातील वाद-तथ्याच्या अनुषंगाने दखल घेऊन उत्तरवादी यांना सूचनापत्र काढणे न्यायोचित नाही, या निष्कर्षाप्रत आल्यामुळे उत्तरवादी यांना सूचनापत्र काढले नाही.

(3)       असे दिसते की, जिल्हा आयोगाने ग्राहक तक्रार क्र. 52/2021 मध्ये वाद-मुद्दे निश्चित करुन दि.26/8/2022 रोजी ग्राहक तक्रार मंजूर केली.

(4)       प्रस्तुत निवेदनपत्राच्या अनुषंगाने अर्जदार यांचे कथन व विधिज्ञांचा युक्तिवाद असा की, आदेशाप्रमाणे वसुली रक्कम अदा करण्याचा त्यांनी निर्णय घेतलेला आहे; परंतु आदेशाच्या अनुषंगाने निश्चित किती रक्कम जमा करावयाची आहे, यासंबंधी अर्जदार यांना आकलन होत नाही. त्यामुळे उभय पक्षांमध्ये देणे-घेणे रकमेसंबंधी उत्तरवादी यांच्याकडून स्पष्टीकरण घेण्यासंबंधी आदेश करावा, अशी विनंती केली.

(5)       जिल्हा आयोगास असणा-या पुनर्विलोकनाचे अधिकार व व्याप्तीसंबंधी विचार केला असता ग्राहक संरक्षण अधिनियम, 2019 चे कलम 40 असे स्पष्ट करते की, The District Commission shall have the power to review any of the order passed by it if there is an error apparent on the face of the record, either of its own motion or on an application made by any of the parties within thirty days of such order.

(6)       ग्राहक संरक्षण अधिनियम, 2019 चे कलम 40 अन्वये केवळ अभिलेखात सकृतदर्शनी दिसणा-या काही चुकांमुळे किंवा दोषामुळे पुनर्विलोकन करण्यासंबंधी जिल्हा आयोगास अधिकारकक्षा आहे.

 (7)      निर्विवादपणे, स्वत:च्या आदेशाचे पुनर्विलोकन करण्यासंबंधी जिल्हा आयोगास अत्यंत मर्यादीत कक्षा आहे. पुनर्विलोकन आवेदनपत्रामध्ये नमूद तथ्ये व युक्तिवादाच्या अनुषंगाने दखल घेतली असता ग्राहक तक्रार क्र. 52/2021 च्या आदेशामध्ये विरुध्द पक्ष यांना स्पष्ट निर्देश दिलेले दिसून येतात आणि जिल्हा आयोगाच्या आदेशामध्ये संदिग्धता नाही. ग्राहक संरक्षण अधिनियम, 2019 चे कलम 40 अंतर्गत आदेशाची पूर्तता करण्यासंबंधी उत्तरवादी यांच्याकडून खुलासा किंवा स्पष्टीकरण मागवावे, अशा प्रकारची अनुमती देता येत नाही. आमच्या मते, जिल्हा आयोगाने ग्राहक तक्रार क्र. 52/2021 मध्ये दि. 26/8/2022 रोजी दिलेल्या आदेशाचे पुनर्विलोकन करणे न्यायोचित नाही. उक्त विवेचनाअंती अर्जदार यांचा प्रस्तुत पुनर्विलोकन अर्ज नामंजूर करण्यात येतो.

(श्री. रविंद्र शे. राठोडकर)                                                        (श्रीमती रेखा  जाधव)                

             सदस्‍य                                                                           अध्यक्ष (अतिरिक्त कार्यभार)             

जिल्हा ग्राहक तक्रार निवारण आयोग, लातूर (महाराष्ट्र)

-०-